يوميات ابليس وابوجهل

صباح الفل يا إبليس بيه
ابليس - صباح الخير يا بني .. اطلع بينا على سنة622
ياااااااااه .. سعادتك إيه اللي هيوديك هناك .. دي الدنيا كات صعبة أوي أيامها
ابليس - وحشوني والله يا عكروت .. أعمل ايه بقى .. نفسي أشوف أبوجهل
- ما تشوفش وحش يابيه .. وصلنا خلاص
ينزل إبليس من العربية .. ويخبط الجرس على بيت أبو جهل .. تفتح له الشغالة
- الأستاذ أبو جهل موجود
- أيوه موجود .. مين حضرتك ؟
- قولي له إبليس
- دقيقة واحدة
يخرج أبو جهل
ابو جهل - أهلاااااااااااااان .. إزيك يابو مُـرّة .. واحشني يا راجل .. إيه الغيبة الطويلة دي .. اتفضل اتفضل
ابليس - والله هفيت على بالي اليومين اللي فاتوا .. والعالم بتوع القرن الواحد وعشرين خنقوني .. قلت آجي أشرب معاك كاسين .. حجرين .. الموجود بقى .. أي حاجة
ابو جهل - على حسابي ولا على حسابك ؟
ابليس - أيوووه عليك .. انت لسه .... زي مانت .. ياراجل ده انا بقالي 200 سنة ما شفتكش .. ده اللي انا علمتهولك ؟
ابو جهل - آه .. ههههههههه .. طب اقعد بس اقعد .. ده الحالة بقت كرب أوي .. ونفسي أفضفض لك شوية
ابليس - خير يابوجهل
ابو جهل - لا والله مافيش .. فاكر انت آخر مرة كنت معانا لما اتفقنا نطلع من رجل قبيلة .. ونقتل محمد ( صلى الله عليه وسلم )
ابليس - آه .. كانت فكرة مالهاش حل
ابو جهل - بس الخطة فشلت .. وقدر يهاجر يثرب ومن بعدها ماشفناش يوم حلو .. والعملية نشفت أوي وبدأوا يقفلوا علينا طرق التجارة .. العيشة بقت صعبة أوي يا إبليس يا خويا
ابليس - بس بس قطعت قلبي . . طيب أنا جاي لك في مشوار حلو .. هيفتح نفسك
ابو جهل - مشوار ايه يا معلم .. قوللي
ابليس - شوف يا سيدي .. أنا جاي لك دلوقت من القرن الواحد وعشرين .. فيه شغلانة جامدة أوي في مصر ظبطتها تظبيطة ما حصلتش .. وأنا حاسس بيك قلت آجي آخدك تتفرج .. أرفع روحك المعدنية شوية
ابو جهل - بس مايكونش التظبيط الخايب بتاعك زي شغلانة من كل رجل قبيلة دي
ابليس - كده برضه .. الله يسامحك .. بس اطمن المرة دي .. هتيجي جون يعني هتيجي جون
ابو جهل - والمشوار ده هنروحه ازاي
ابليس - اركب بس اركب .. ما تخافش مش هأخرك
ركب أبو جهل العربية مع إبليس .. ووصلوا القاهرة .. أبو جهل تـَنـّح
ابو جهل - إيه ده يا إبليس يا خويا .. احنا لسه في الدنيا ؟؟
ابليس - هههههه .. جمد قلبك ياراجل .. احنا بعد 1400 سنة من أيامكم
ابو جهل - وايه الناس دي .. عاملين في نفسهم كده ليه
ابليس - إيه مش عاجبينك ؟
ابو جهل - يعني .. الستات لابسين عريان قوي .. والرجالة شكلهم شبه الستات .. وبص الواد ده ماشي مع البنت ازاي .. بيحضنها في الشارع كده .. اخص عالرجالة
ابليس - ههههههه .. ياراجل ماتقولش كده .. دول على فكرة مسلمين
ابو جهل - إيه ؟؟ .. هو دين محمد( صلى الله عليه وسلم ) وصل لغاية هنا
ابليس - آه طبعا .. من زمان أوي .. بص الجوامع أد إيه .. واللي انت سامعه ده اسمه الأذان .. بينادوا عالناس وقت الصلاة عشان يصلوا
ابو جهل - الله ؟؟ .. أمال مالهم قاعدين كده ما بيتحركوش .. وعشرة عشرين واحد بس اللي داخلين الجامع
ابليس - آه .. أصل النهارده فيه ماتش .. واللي قاعدين دول بيتفرجوا عالماتش في القهوة
ابو جهل - ماتش؟؟ .. إيه ده ؟؟
ابليس - دي فكرة حلوة من أفكار أخوك .. الناس بتحب الرياضة .. فيها حاجة دي ؟
ابو جهل - لأ مافيهاش
ابليس - أنا قعدت بقى أكبرها وانفخ فيها لحد مالناس بقت تحبها أكتر من الصلاة
ابو جهل - يابن الإيييييييه ؟؟ .. ده انت هتروح جهنم
ابليس - فال الله ولا فالك .. فقري طول عمرك
ابو جهل - بس ايه اللي مكتوب عالحيطان ده ؟؟ .. الإسلام هو الحل ؟؟ حل إيه ؟؟
ابليس - ماهو ده اللي انا جايبك عشانه
ابو جهل - طب نورني .. ايه الموضوع
في الحلقة القادمة ان شاء الله هنشوف ايه الموضوع